Жыл басынан бері облыста отбасылық-тұрмыстық қатынастар саласында 1141 құқық бұзушылық тіркеліп, 874 азамат жауапқа тартылды. Оның 85-не ескерту жасалса, 294-і әкімшілік қамауға алынды, деп хабарлайды Qyzyljarnews.kz тілшісі.
Қалалық полиция басқармасы бірінші полиция бөлімі бастығының орынбасары Әбілқайыр Қазжанның айтуынша, тәртіп сақшылардың профилактикалық есебінде 2362 азамат тұр.
– ҚР Әкімшілік құқық бұзушылық туралы Кодекстің 73 бабының 1-тармағында көзделген денсаулыққа қасақана жеңіл зиян келтірген 89 адам жауапқа тартылды. Олардың 22-не ескерту жасалса, 8-і әкімшілік қамаққа алынды. 59 факті бойынша тараптар татуласты. Ал аталмыш Кодекстің 73 бабының 1 тармағында көрсетілген ұрып-соғу фактілері бойынша 3 азамат анықталып, ескерту түрі және қамауға алу сынды жаза түрлері қолданылды.
Отбасылық жанжал үшін агрессорға ескерту жасалады немесе 5 тәулікке қамауға алыну жазасы қарастырылған. Ұрып-соққаны үшін – 10 тәулікке, егер осы іс-әрекетін қайталаса – 20 тәулікке қамауға алынады. Денсаулыққа жеңіл зиян келтіргені үшін – 15, ал қайталап жасаса – 25 тәулікке қамауға алынады, — дейді Әбілқайыр Қазжан.
