Ғабит Мүсірепов атындағы ауданда өндірілген ауыл шаруашылығы өнімінің көлемі 97,6 млрд. теңгені құрады. Дәнді дақылдардың гектар берекелігі 10,8 центнер болса, майлы дақылдар 6,2 центрнерден айналды, деп хабарлайды Qyzyljarnews.kz тілшісі.
Аудан әкімі Руслан Аңбаевтың мәліметінше, биыл жерге 29 мың тоннадан астам минералды тыңайтқыш сіңірілді. Нәтижесінде ауа райының қолайсыздығына қарамастан астық уақытында бастырылды. Ал мал шаруашылығын дамыту мақсатында 2 тауарлы-сүт фермасы тұрғызылуда.
– Бүгіндері «УК Әділ» серіктестігі 400 басқа арналған ферманың құрылысын бастады. Симментал тұқымдас ірі қараның 309 басы жеткізілді. «Буденное-СК» серіктестігі 1200 малға арналған тауарлы-сүт фермасын тұрғызып жатыр. Мұндай жұмысты «Нежинка Ерке» және «АЗКО» ЖШС-лары да жүзеге асырмақ. Келер жылы «Адани-Агро» ЖШС сүтті бағыттағы 3 ферма салмақшы, — дейді Руслан Аңбаев.
