Облыс прокурорлары лауазымды тұлғалардың электрондық-цифрлық қолтаңбаны заңсыз бергенін анықтады, деп хабарлайды Qyzyljarnews.kz тілшісі.
СҚО прокуратурасының мәліметінше, Тайынша ауданының тұрғын үй-коммуналдық шаруашылығы бөлімінің басшысы электрондық-цифрлық қолтаңбасын қарамағындағы бас маманға берген. Ол өз кезегінде демалыста жүрген бастығының жеке кілтін пайдаланып, автомобиль жолдарын күтіп ұстау бойынша мемлекеттік сатып алу туралы шартқа қол қойды.
– ҚР ҚБтК-нің 640-бабындағы 5-бөлігінде көзделген жазаға аудандық бөлімінің басшысы тартылып, оған айыппұл салынды. Дәл осындай заң бұзушылыққа жол берген облыстық еңбек және әлеуметтік қорғау департаментінің басшысы да жазаға тартылды. Сондай-ақ мұндай қателікті жіберген 24 азамат анықталды. Олар – Ақжар, Қызылжар, Тайынша аудандарының жергілікті атқарушы билік органдарында қызметкерлері, – делінген СҚО прокуратурасының мәліметінде.
Прокурорлық қадағалау актілері бойынша жол берілген бұзушылықтарды жою және кінәлі лауазымды тұлғаларды заңда белгіленген жауапкершілікке тарту бойынша шаралар қабылданды. Прокуратура электрондық цифрлық қолтаңбаның жабық кілтін басқа адамдарға заңсыз бергені үшін 51 750 теңге көлемінде әкімшілік айыппұл қарастырылғанын еске салды.
