Бүгінгі таңда «TANBA» электрондық жүйесі есебіне 7030 үй жануар енгізілді. Олардың 4120-сы ит пен 2910-ы мысық, деп хабарлайды Qyzyljarnews.kz тілшісі.
СҚО ветеринария басқармасының мәліметінше, өткен жылы қаңбығас үй жануарларын идентификациялауға, екпе қоюға және зарарсыздандыруға 17,1 млн. теңге бөлінді. Нәтижесінде 300-не чип қойылып, 284-і қайта тіршілік ортасына, қалғаны арнайы тәлімбақтарға жіберілді.
– Үй жануарларына чип қою жұмыстары жалғасын табуда. Негізігі мақсаты – ит пен мысық иелерін жауапкершілікке үйрету. Идентификациялық нөмір беру арқылы жоғалған жануарларды тез табуға болады. Бүгінгі таңда қаңғыбас хайуанаттарға айрықша көңіл бөлінуде, — дейді СҚО ветеринария басқармасының бөлім басшысы Наталья Тараканова.
Мамандардың сөзінше, өткен жылы иттер 858 адамды қапқан. Оның 498-інің иесі бар, 360-сының иесі жоқ.
– Былтыр үй жануарларын қарамаған 724 ит пен мысық иесі жауапқа тартылды. Полицияның мәліметінше, оларға 19 млн. 199 мың 250 теңге көлемінде айыппұл салынды, — дейді Наталья Тараканова.
