Соңғы кездері облыста автокөліктегі өрт оқиғалары жиіледі. Жыл басталғалы өңірде 6 теміртұлпар отқа оранды. Өткен жылдың ішінде осындай 76 факті тіркелсе, оның ішінде 20-сы жүк көлігі. 54 жеңіл және 2 ауыл шаруашылығы техникасы өртке оранған, деп хабарлайды Qyzyljarnews.kz тілшісі.
СҚО ТЖД баспасөз қызметінің мәліметінше, автокөліктерде орын алған төтенше жағдайлардың негізгі себебі – қозғалтқыштағы сымдардың қысқа тұйықталуы.
– Автокөлікте тіркелген өрт оқиғаларының соңғысы қаңтардың 17-сі күні Володаровский көшесі, 75 мекенжайы бойынша орын алды. «Toyota Camry» маркалы автомобильдегі қозғалтқыш отқа оранды. Мамандар қозғалтқыштан шыққан тілсіз жау 10 минуттың ішінде техниканы өртеп жіберуі мүмкін екенін ескертеді, — дейді баспасөз қызметінің мамандары.
Мамандар өрт орын алған жағдайда көлікті жол жиегінде дереу тоқтатып, арнайы өрт сөндіру құралдарымен қызыл жалынды өшіру қажет екенін айтуда.
