СҚО ПД есірткі қылмысына қарсы іс-қимыл басқармасының қызметкерлері синтетикалық есірткі таратуға қатысы бар күдікті әйелді ұстады, деп хабарлайды Qyzyljarnews.kz тілшісі.
Өткен жылдың желтоқсан айында полицейлер Набережный көшесінің бойында «Hyundai Elantra» автокөлігін тоқтатты. Теміртұлпар салонында Астана қаласының 43 жастағы тұрғыны отырған. Ол Петропавл қаласында уақытша тұрған. Әйелден 80 түйіншек тәркіленді. Сараптама нәтижесіне сәйкес бұл зат мефедрон синтетикалық есірткісі болып шықты. Оның тұрғылықты мекенжайынан да есірткі мен буып-түю құралдары табылды. Тәркіленген заттың жалпы салмағы 0,5 келіден асты. Бұның 247,8 грамы – мефедрон және 322,36 грамы – α-PvP есірткісі.
– Аталған факті ҚР Қылмыстық кодексінің 297-бабының 3-бөлігі бойынша Сотқа дейінгі тергеп-тексерулердің бірыңғай тізіліміне енгізілді. Жедел уәкілдердің ақпараты бойынша интернет-дүкендегі кураторлары күдіктіні буып-түюші ретінде Петропавл қаласына жіберген. Әйел 2 ай жұмыс істеген. Алынған есірткі партиясы облыста тәркіленген ең ірі синтетикалық есірткі партияларының бірі, – дейді СҚО ПД есірткі қылмысына қарсы іс-қимыл басқармасының бастығы Руслан Сапаров.
