Облыстың денсаулық сақтау мекемелеріне 19 санитарлық көлік сатып алынды. Бұл туралы СҚО әкімі Ғауез Нұрмұхамбетов әлеуметтік желідегі жеке парақшасында жазды, деп хабарлайды Qyzyljarnews.kz тілшісі.
Жаңа сатып алынған санитарлық көліктердің 10-ы қаладағы емдеу мекемелеріне табысталса, 9-ы аудандық ауруханаларға жөнелтілді. Облыс әкімінің айтуынша, жыл сайын денсаулық сақтау саласына тиесілі автопарк жаңа техникамен толығуда.
— Біздің басты міндетіміз — медициналық қызметтің сапасын жақсарту. Бұл ретте ауруханаларға жаңа заманауи қондырғылар мен көліктер сатып алынып жатыр. Осы жұмыс әлі де жалғасын табады, — деді СҚО әкімі.
Биыл денсаулық сақтау саласын жақсарту мақсатында «Ауылдық денсаулық сақтауды жаңғырту» ұлттық жобасы аясында ауылдарда 38 медициналық нысанның құрылысы басталады. Бұл дәрігерлік амбулаториялар, ФАП-тар мен медпункттер. Осы жылы Уәлиханов ауданының орталығы Кішкенекөлде жаңа емхана ашылады. Сондай-ақ, көктемде көпсалалы облыстық аурухананың құрылысы қайта жанданбақ.
