Мемлекеттік қызмет істері Агенттігінің облыстық департаменті өкілдері 2021 жылы 32 қорытынды тексеріс жүргізіп, мемлекеттік сатып алу туралы заңды бұзған 229 фактіні анықтады, деп хабарлайды qyzyljarnews.kz тілшісі.
Бұл заңбұзушылықтардың 97,4 пайызы жергілікті атқарушы органдардың еншісінде, деді департамент басшысының орынбасары Жанат Жұмабаев ведомствоаралық жұмыс тобының отырысында.
Оның айтуынша –«Бірлескен жұмыстар өз нәтижесін беріп жатыр, оған мемлекеттік сатып алулар саласындағы құқық бұзушылықтардың 66 пайызға азайғаны дәлел. Бұл мамандардың сауаты артқанын, кәсіби деңгейі өскенін көрсетеді. Ведомстволық ақпараттық жүйелер тексеріліп, заңбұзушылықтардың алдын алуға бағытталған жұмыстар жақсы жүргізіліп жатыр».
Бірақ, әлі де болса олқылықтар аз емес. Мәселен, Қызылжар ауданының тұрғыны өтініші қызмет көрсетушіге жолданбауының салдарынан, жер алуға берген өтініші қанағаттандырылмаған. Департамент мамандарының араласуынан кейін ғана жерге кезекке қойылған. Жалпы, Қызылжар ауданында заңбұзушылықтар алдыңғы жылмен салыстырғанда 2 есеге көбейген.
