Кеше ғана Сергеев су қоймасындағы судың деңгейі 363 см-ге дейін жетсе, бүгін төмендеп, 360 см-ді көрсетті, деп хабарлайды Qyzyljarnews.kz тілшісі.
СҚО ТЖД хабарлауынша, облыста су тасқыны басталғалы 3419 үйді су басып, әлі күнге дейін 3223-і су астында тұр. Бүгіндері эвакуацияланған 14388 адамның 764-і баспаналарына оралды.
– Сергеев су қоймасындағы судың деңгейі төмендеп жатыр. Қазіргі уақытта судың деңгейі 360 см көрсетіп тұр. Естеріңізге салсақ, рекордтық көрсеткіш – 425 см болған еді. Жақында тасқын судың екінші толқыны күтілуде, – дейді ТЖД мамандары.
Ал Тоқсан би гидробекетінде 48 см-ге, Крещенка елді мекенінің маңында 15 см-ге, Сергеев қаласының жанында 1 см-ге төмендеген.
Екінші толқын Петропавлға қарай келе жатыр. Мәселен Покровка елді мекенінің маңында 27 см-ге, Новоникольское ауылының жанында 29 см-ге көтерілді.
Петропавлға әзірге жеткен жоқ, өткен тәулікте мұнда Есіл өзенінің су деңгейі 4 см-ге түсті.
