Қызылжар ауданына қарасты Барневка ауылының тұрғыны Сания Карасева өзіне дәрігерлер тарапынан тиісті көмек көрсетілмей жатқанына шағымданды. Ол жанайқайын Құмар Ақсақаловтың әлеуметтік желідегі парақшасына жазған,деп хабарлайды Qyzyljarnews.kz тілшісі.
Сания Карасеваның айтуынша, оған қажетті деңгейдегі жағдай жасалмай отыр. Азаматшаның жеке оңалту бағдарламасы мен керекті таяғы жоқ, санаторлық емдеу де көрсетілмейді екен. Тіпті, тегін дәрі-дәрмекті де ала алмауда.
-Мұндай жағдай мамандардың немқұрайлығынан орын алып отыр. Сол себепті, Қызылжар ауданының әкімі мен жұмыспен қамтуды үйлестіру және әлеуметтік бағдарламалар, денсаулық сақтау басқармаларыны басшылығына Сания Қарасеваға көмек пен қолдау көрсетуді тапсырдым. Жалпы, аудан мен округ әкімдері мұндай жағдайларға жол бермеуі тиіс. Мүгедектерге ерекше көңіл бөлу керек. Олар мемлекет кепілдік берген әлеуметтік көмекті толық көлемде алулары қажет,-деп жазды Құмар Ақсақалов.
