PhD докторы, Еуразия халықтарының популяциялық генетикасы жөніндегі сарапшысы Жақсылық Сәбитов солтүстікқазақстандық оқытушыларға тарихтан шеберлік сағатын өткізді, деп хабарлайды Qyzyljarnews.kz тілшісі.
Еске сала кетейік, өткен жылы ел Президенті Қасым-Жомарт Тоқаев отандық тарихшыларға Қазақстанның академиялық үлгідегі жаңа тарихын жазуды тапсырған болатын. Тарихшының айтуынша, бұл ұлттық сананың жаңғыруына сеп болмақ.
-Жаңа ғылыми тәсілдерді елеп-ескере отырып, Қазақстан тарихын қайтадан жазатын уақыт келді. Деректердің барлығы мектеп оқулықтарына енгізілуі керек. Қазірдің өзінде ай сайын жаңа мәліметтер шығады. Өкінішке қарай, оны қоғамның барлығы дерлік біле бермейді. Жалпы, бүгінгі іс-шарада мен жергілікті оқытушыларға 20 жылда ел аумағында табылған археологиялық деректер мен тарих бойынша жаңалықтарды баяндадым,-дейді Жақсылық Сәбитов.
Елордалық профессор өткізген дәріске өңірдегі мектеп ұстаздары мен университет оқытушылары қатысты.
