Қазақстан Республикасы ІІМ азаматтық алу тәртібін түсіндірді, деп хабарлайды Qyzyljarnews.kz тілшісі.
Заңнамада азаматтыққа қабылдаудың екі нұсқасы қарастырылған:
Біріншісі Қазақстан Республикасы Президентінің жанындағы Азаматтық мәселелері жөніндегі комиссияның шешімі негізінде. Материалдарды қарастыру мерзімі 6 ай.
Қазақстанда тұрақты тұратын адамдар азаматтықты өзгерту мәселелері бойынша тіркелген жеріндегі ішкі істер органдарына өтініш бере алады. Облыстардың, республикалық маңызы бар қалалардың және астананың полиция департаменттері Ұлттық қауіпсіздік органдарының пікірімен бірге материалдарды ішкі істер министрлігіне жібереді, ол өз қорытындысын жасайды және материалдармен бірге Комиссияның жұмыс органына ұсынады.
Мемлекет басшысының азаматтық мәселелері жөніндегі Жарлығының орындалуы туралы облыстардағы ПД-тері Жарлыққа қол қойылған сәттен бастап бір айға дейінгі мерзімде Көші-қон қызметі комитетін хабардар етеді.
Екінші нұсқа – жеңілдетілген тәртіп, қарау мерзімі — 3 ай. Азаматтыққа қабылдау аумақтық ПД қорытындылары бойынша жүзеге асырылады.
а) егер өтініш беруші Беларусь КСР-інің, Қазақ КСР-інің, Қырғыз КСР-інің немесе РСФСР-дің азаматтығында болса және сонымен бір мезгілде бұрынғы КСРО-ның азаматтығында болса, 1991 жылғы 21 желтоқсанға дейін Қазақстан аумағында туған немесе тұрған болса;
б) өтініш берушіде Қазақстан Республикасының аумағында тұрақты тұратын және оның азаматтары болып табылатын жақын туыстарының бірі болған кезде осы екінші нұсқа негізінде алуға болады.
2021 жылы 24 119 адам Қазақстан азаматтығын қабылдады. Президенттің Жарлығы бойынша – 1 807, жеңілдетілген тәртіппен – 22 312. Ал 2020 жылы 24 265 адам тіркеуге алынды. Қазақстан Республикасы Президентінің Жарлығымен – 1 655, жеңілдетілген тәртіппен – 22 610.
