Синоптиктер сәуір айының соңында Солтүстік Қазақстан облысында көктемгі су тасқыны болады деп болжап отыр. Кейін мамырда Петропавл маңында да Есіл өзені тасуы мүмкін, деп хабарлайды Qyzyljarnews.kz тілшісі.
Қазіргі уақытта Сергеев су қоймасы 76 %-ға толған. Ал былтыр бұл көрсеткіш 86 %-ды көрсетті. Су қоймасының жалпы сыйымдылығы — 1,3 млрд текше метр. Тасқын болған жағдайда қоймадағы су 1,5 млрд текше метрге дейін жетеді деген болжам бар.
«Қазгидромет» РМК СҚОФ инженері Роман Гиричевтың айтуынша, Есіл өзеніндегі су қоры биыл орташа көрсеткіштен 33 %-ға көп, бірақ, былтырғыдан 33 %-ға кем.
Сәуір айының бірінші онкүндігінде күн жылынып, шағын өзендер таси бастайды деп болжануда. Екінші онкүндікте шағын өзендер арнасынан шығып, үшіншісінде Есіл өзені тасуы ықтимал.
-Соңғы мәлімет бойынша, облыста қардағы су қоры біркелкі емес. Ең төмен көрсеткіш Ақжар және Тайынша аудандарында тіркелді, 16 мм-ден 29 мм-ге дейін ғана. Ең жоғары су қоры Аққайың, Тимирязев, Уәлиханов және Ғабит Мүсірепов атындағы аудандарда, 80-84 мм аралығында. Қалған аудандарда жылдағы нормаға сәйкес, — дейді Роман Гиричев.
