СҚО-да мас болып рөлге отырған 27 жүргізушіге қатысты қылмыстық іс қозғалды. 10-ы бас бостандығынан айырылды, деп хабарлайды Qyzyljarnews.kz тілшісі.
СҚО полиция департаменті баспасөз қызметінің мәліметінше, жуырда Петропавл қаласының 32 жастағы тұрғыны көлік басқару құқығынан өмір бойына айырылып, 4,5 жылға қамауға алынған.
-2021 жылдың қыркүйегінде бұрын көлік жүргізу құқығынан айырылған ер адам мас күйінде жол-көлік оқиғасын жасады. Оқиға таңғы сағат 4.00 шамасында Қазақстан Конституциясы мен Жамбыл көшелерінің қиылысында болған. Көліктің салонында үш жолаушы келе жатқан. Соққы салдарынан бір адам облыстық ауруханада қайтыс болды. Аталған факті бойынша полицейлер Қазақстан Республикасы Қылмыстық кодексінің 346-бабы 5-бөлігі бойынша материал жинастырды. Жүргізуші бас бостандығынан айырылды, — дейді СҚО ПД анықтау басқармасы бастығының міндетін атқарушы Жеңіс Темірбеков.
Жыл басынан полицейлер облыс жолдарында 381 мас жүргізушіні ұстады. Жол қозғалысы ережелерін бұзудың 25 мыңнан астам дерегі тіркелді. Биыл өңір жолдарында 64 жол-көлік апаты болып, салдарынан 14 адам қаза тапты, 92 адам жарақат алды.
