Маусым айынан бастап қазақстандықтар 1 сәуірде уәде етілген өсірілген зейнетақы мен жәрдемақыны ала бастайды, деп хабарлайды Qyzyljarnews.kz тілшісі.
Инфляцияны ескере отырып, Мемлекеттік әлеуметтік сақтандыру қорынан төленетін ынтымақты зейнетақы мен кейбір әлеуметтік төлемдердің мөлшері қосымша 4%-ға индекстелді. Базалық зейнетақы мен мемлекеттік жәрдемақылар да сәуір айында АЕК және төменгі күнкөріс деңгейі өсуіне байланысты 4% — ға көтерілді.
Осылайша, заңға сәйкес 1 сәуірден бастап жәрдемақылар мен өзге де әлеуметтік төлемдерді есептеу үшін айлық есептік көрсеткіш — 3 180 теңге мөлшерінде, ең төменгі зейнетақы — 48 032 теңге, ең төменгі күнкөріс — 37 389 теңге, базалық зейнетақы төлемінің ең төмен мөлшері — 20 191 теңге болып бекітілді.
Қазақстандықтар жаңадан еспетелген зейнетақы мен жәрдемақыны 2022 жылғы маусымнан бастап ала бастайды. Шамамен 6,6 млн. төлем ұлғайтылды.
Естеріңізге сала кетейік, зейнетақылар, жәрдемақылар мен әлеуметтік төлемдер мөлшерінің кешеуілдеп өсуіне байланысты қазақстандықтар сәуір және мамыр айларына қосымша төлем күтуде.
