Өткен жексенбі күні әлеуметтік желілерде аялдама павильонын сындырған сәті түсірілген видео тараған болатын. Бұл оқиға 5 маусымда Петропавл қаласындағы Қизатов көшесіндегі аялдамада орын алғаны белгілі болды, деп хабарлайды Qyzyljarnews.kz тілшісі.
Аталған факті бойынша полиция қызметкерлері Қазақстан Республикасы Әкімшілік құқық бұзушылық туралы кодексінің 434-бабы «Ұсақ бұзақылық» бойынша әкімшілік материал жинады.
Қазіргі уақытта Петропавлдың 28 жастағы тұрғыны ұсталды.
-Шешім қабылдау үшін материал сотқа жолданады. Әкімшілік заңнаға сай айыппұл немесе 10 тәулікке дейін қамауға алу түріндегі жауапкершілік көзделген. Сонымен қатар, құқық бұзушы шығынның орнын толтыруы тиіс, – дейді Петропавл қалалық жергілікті полиция қызметі бөлімшесінің бастығы Қанат Жұмабаев.
Ұсталған адам аталған видеоны әлеуметтік желілерде көргенде қатты ұялғанын айтты. Жас жігіт өзінің қылығы үшін кешірім сұрады.
Фото: СҚО ПД баспасөз қызметі.
