Жол активтері ұлттық сапа орталығы СҚО бойынша филиалы баспасөз қызметінің мәліметінше, биыл мамандар республикалық маңызы жолдарға 185 инспекциялық тексеріс жүргізген. Нәтижесінде, 191 кемшілік анықталды, деп хабарлайды Qyzyljarnews.kz тілшісі.
-Ескертулердің басым бөлігі республикалық жолдарды қысқы және көктемгі-жазғы уақытта күтіп ұстауға қатысты. Жұмыс сапасыз атқарылған. Жол-құрылыс маусымы басталысымен жөндеу нысандарында жұмыс сапасына ішінара сараптама жүргізілді. Нәтижесінде асфальт бетонның біркелкі төселмегені, жаңа жолда ойықтардың пайда болуы, сапасыз нығыздалуы секілді бірқатар олқылықтар анықталды, — дейді Жол активтері ұлттық сапа орталығы СҚО филиалының директоры Жолдыбай Тентеков.
Кемшіліктер анықталған жағдайда тапсырыс берушілерге оны жою жөнінде ұйғарым жіберіліп отырады. Жолдыбай Тентековтің айтуынша, мамандар жыл басынан бері 282 жол-құрылыс материалының сынамасын алған.
-Соның 254-і бүгінде тексеріліп, 78-і құқықтық-техникалық құжаттардың нормаларына сәйкес болмай шықты. Ол сынамалар негізінен ауылдық округтерде ауылішілік көше жолдарынан және аудандық маңызы бар автожолдардан алынды, — дейді Жолдыбай Тентеков.
Фото: Qyzyljarnews.kz / Талғат Тәнібаев
