СҚО — да өткен аптада бес тұрмыстық өрт тіркеліп, екі автокөлік өртенді. Барлық жағдайларда электр сымдарының қысқа тұйықталуынан от шыққан, деп хабарлайды Qyzyljarnews.kz тілшісі.
Брифингте басқарма бастығы Назымбек Елемесов бұдан бөлек, 23 от тұтану мен 18 авариялық-құтқару жұмыстары жүргізілгенін айтты. Оның ішінде құтқарушылар төрт рет су айдындарына көмекке барып, екі рет жол-көлік оқиғаларына шықты. Бір апта ішінде суда жеті адам құтқарылды. Өңірдің 15 тұрғынын тұрғын үйлерден эвакуациялауға тура келді. Сондай-ақ, есіктердің жабылып қалғаны туралы 10-нан астам қоңырау келіп түскен.
— Өткен аптада төрт дауылды ескерту жарияланды. Аптаның басында күн ысып, сынап бағанасы 35 градустан жоғары көтеріледі. Апта соңында өткінші жаңбыр, найзағай ойнап, бұршақ жауады деген болжам бар. Батыстан, оңтүстік-батыстан солтүстік-шығысқа секундына 15-20 метр жылдамдықпен жел соғады. Барлығыңызды өрт қауіпсіздігі және судағы қауіпсіздік ережелерін сақтау қажеттігін ескертеміз, — деді Назымбек Елемесов.
