Солтүстік Қазақстан облысында артемия салина шаяндарын заңсыз өндіру бойынша екі қылмыстық іс қозғалды. Бұл шаян тәрізділердің кисталары шетелде жоғары сұранысқа ие және оларды жинау үшін браконьерлерге көп ақша ұсынылады, деп хабарлайды Qyzyljarnews.kz тілшісі.
Мамандардың айтуынша күз айлары артемия кисталарын жинаудың ең қолайлы уақыты. Осы кезеңде браконьерлер белсенділік танытып, заңсыз аулауға көшеді. Заңсыз аулаумен көбінесе жақын маңдағы ауылдардың тұрғындары айналысып, оларға бір қапқа сатып алушылар 50 мың теңгеге дейін ұсынады.
— Артемия салина шаяндарын заңсыз өндіру – қылмыстық жаза қолданылатын әрекет. Оның бір келісінен 3 айлық есептік көрсеткіші көлемінде шығын келеді. Биыл осыған байланысты екі қылмыстық іс қозғалды,- дейді «Есіл облысаралық бассейндік балық шаруашылығы инспекциясы» РММ басшысының орынбасары Марат Есімсейітов.
