Петропавл тұрғыны Юрий Волосников із-түссіз жоғалды. Үйінен шығып кеткен ер адамнан 20 күннен бері хабар жоқ, деп хабарлайды Qyzyljarnews.kz тілшісі.
Солтүстік Қазақстан облысы полиция департаменті баспасөз қызметінің мәліметінше, тәртіп сақшылары із-түссіз жоғалған 61 жастағы Юрий Анатольевич Волосниковке іздеу жариялады. Петропавл тұрғыны 24 қыркүйекте Кәрім Сүтішев көшесіндегі үйінен шығып кетіп, бүгінге дейін оның қайда жүргені белгісіз.
Сол күні ер адамның үстінде қоңыр түсті жеңіл күртеше, көк түсті джинсы болған. Бойы шамамен – 160 см, арықша келген.Іздеу жұмыстарына солтүстікқазақстандық полиция бөліністерінің жеке құрамы айналысуда. Волонтерлер әлеуметтік желілерде бағыт-бағдар таратып, іздеу іс-шараларына көмектесіп жатыр. СҚО ПД криминалдық полиция басқармасының бастығы Марат Жұмалиевтың айтуынша, жыл басынан облыста адамдардың із-түзсіз жоғалғаны туралы 432 өтініш тіркелген. Бүгінгі таңда 426 адамның жүрген жері анықталды.
Полицейлер жоғалған адам туралы қандай да бір ақпарат болса, мына 8 (7152) 49-39-49, 8 (7152) 49-30-74, 8-700-580-08-02 телефон нөмірлеріне немесе «102» арнасына хабарласуды сұрайды.
