Петропавл тұрғыны полицияға сирек кездесетін мылтықты тапсырды, – деп хабарлайды Qyzyljarnews.kz тілшісі «Polisia.kz» сайтына сілтеме жасап.
Қалалық полиция басқармасына 58 жастағы қала тұрғыны өз гаражынан қоқыс арасынан қос ұңғылы мылтықты тапқанын хабарлады. Ер адам аңшы әрі ресми түрде қару-жарақ ұстауға рұқсаты бар болғандықтан заңсыз сақталған қару үшін қарастырылған жауапкершілікті жақсы біледі. Сондықтан ол қаруды бірден полицияға тапсыруды жөн санады. Полицейлер оны сараптамадан өткізіп, мылтық оқ атуға жарамды екенін растады.
Бір қызығы, мылтық бельгиялық «Bayard» фирмасының сирек кездесетін аңшы қаруы болып шықты. Оның үстінде ойылып жазылған белгілерін тексергеннен кейін криминалистер аталған ату құралы 1893-1898 жылдар аралығында шығарылған болжамға келді.
– Азаматтар тіркелмеген қаруды ерікті түрде тапсырған жағдайда ғана қылмыстық және әкімшілік жауапкершіліктен босатылады. Өткен жылы облыс аумағында заңсыз айналымнан 128 бірлік тіркелмеген атыс қаруы алынды, оның 17-і Петропавлда, — дейді СҚО ПД Әкімшілік полиция басқармасының бастығы Серік Әлжанов.
