СҚО тұрғыны керамикалық сақинаның кесірінен саусағынан айырыла жаздады. 43 жастағы ер адам құтқарушылардың көмегіне жүгінді, деп хабарлайды Qyzyljarnews.kz тілшісі.
Төтенше жағдайлар департаментінің баспасөз қызметінің хабарлауынша, таңертең 112-ге әйел ұлына көмек сұрап қоңырау шалған. Оның айтуынша, ер адамның саусағы керамикалық сақинаның кесірінен ісіп кеткен.
— Тез арада «операциялық үстел» дайындалып сақинаны саусақтан құрал саймандардың көмегімен шешіп алуға кірістік. Шынашағының ісіп кеткені соншалық, қауіпсіздік үшін жұқа пластиктен жасалған тақтайшаны сырғытып, әбден қиналуға тура келді. Кесіп ала алмағандықтан, сындыруға тура келді, — деді құтқарушы Нұрболат Айсин.
Жалпы, жыл басынан бері құтқарушылар сақинасын шеше алмай қиналған 10 адамға көмектескен.
