Қазақстан Республикасы заңнамасында нақты айтылғандай, уақытша немесе тұрақты тіркелген азаматтар ғана дауыс бере алады. Адамдарды конституциялық құқығынан айырмау үшін еліміздің Премьер-министрі Әлихан Смайылов 1 күнге тікелей сайлау учаскелерінде тіркелуге мүмкіндік беретін қаулыға қол қойды, деп хабарлайды Qyzyljarnews.kz тілшісі Bes-media тelegram арнасына сілтеме жасай отырып.
Үкіметтің қаулысымен ішкі мигранттарды тіркеу ережелеріне өзгерістер енгізілді, бұл азаматтарды сайлау күні сайлау учаскесінде тіркеуге мүмкіндік береді.
— «Қазақстан Республикасындағы сайлау туралы» Қазақстан Республикасының Конституциялық заңына сәйкес сайлау құқығын іске асыру және азаматты сайлаушылар тізіміне енгізу мақсатында тұрғылықты жері, ғимараты немесе үй-жайы меншік иесінің өтініші негізінде тұрғылықты жері бойынша тіркеуден шығарылған адамдарды сайлау күні сайлау учаскесінің мекенжайы бойынша ғимаратта немесе үй-жайда тіркеуге жол беріледі, — делінген ішкі мигранттарды тіркеудің жаңартылған ережесінде.
Осылайша, тұрғылықты тіркеуі жоқ қазақстандықтар 20 қарашадағы сайлауда дауыс бере алады.
