Футболдан Қатарда өтіп жатқан әлем біріншілігінің жартылай финалына шыққан құрамалар белгілі болды, деп хабарлайды Qyzyljarnews.kz тілшісі.
Ширек финалдың алғашқы ойынында Хорватия мен Бразилия кездесті. «Education City» стадионында өткен матчтың негізгі уақытында есеп ашылған жоқ. Экстра таймның 105-ші минутында Неймар мергендігімен көзге түсіп, Бразилияны алға шығарған. Алайда Тите шәкірттерінің қуанышы ұзаққа созылмады. Кездесудің аяқталуына бірер минут қалғанда Хорватия құрамасының шабуылшысы Бруно Петкович есептті теңестіріп кетті. Ойын соңындағы пенальти сериясында Златко Даличтың шәкірттері 4:2 есебімен оңтүстік америкалықтардан басым түсті.
Келесі күні Нидерланды мен Аргентина құрамалары жартылай финал жолдамасын сарапқа салды. Бірінші таймда Науэль Молина есеп ашса, 71-минутта нидерландылық қорғаушы Дензел Думфрис өз айып алаңында Маркос Акуньяны шалып жықты. Лионель Месси 11 метрлік нүктеден мүлт кетпеді. Дегенмен 83-ші минутта оң қанаттан Стевен Бергхейс асырған допты Вут Вегхорст баспен торда тулатып, есепті қысқартты. Ал қосымша уақыт аяқталар тұста дәл сол Вут Вегхорст таразы басын теңестіріп кетті. Экстратаймда нәтиже өзгермей, матч тағдыры пенальти сериясында шешілді. Он бір метрлік айып добын орындау кезінде аргентиналық ұжымның жолы болды.
Ширек финалдағы үшінші кездесуде Марокко және Португалия құрамалары шеберлік байқасты. Кездесу басталғаннан португалиялық футболшылар тізгінді өз қолына алған. Дегенмен марокколықтар лайықты қарсылық көрсете білді. Уақыт өте қарсы шабуылдарға шыға бастады. Осындай сәттердің бірінде Испанияның «Севилья» командасында ойнайтын Юссеф Эн-Несири әріптесі Яхья Аттийяттың әуелете берген пасын голға айналдырды. Нәтиже ойын соңына дейін өзгерген жоқ. Осылайша Марокко футбол тарихында Африка құрлығынан жартылай финалға шыққан алғашқы құрама атанды. Ширек финалдың соңғы кездесуінде Англия мен Франция командалары кездесті. «Аль-Байт» стадионында өткен матчта Дидье Дешамның шәкірттері 1:2 есебімен жеңіске жетті. Гол авторлары Орельен Чуамени, Оливье Жиру және Хари Кейн. Осылайша әлем біріншілігінің жартылай финалында ойнайтын төрт құрама да белгілі болды. 13 желтоқсан Аргентина Хорватиямен кездессе, 14 желтоқсанда Франция Мароккомен ойнайды.
