Жерлесіміз Ирина Мишунина халықаралық байқауда Гран-при иеленді. Сайыс Алматыдағы Чайковский атындағы музыкалық колледжде өткен. Оған Қазақстанның түкпір-түкпірінен дарынды бүлдіршіндер жиналды, деп хабарлайды Qyzyljarnews.kz тілшісі.
– Аталмыш өнер додасында топ жарғанымды естігенде төбем көкке жеткендей болды. Жағымды әсер алып қайттым. Бұл тәжірибе ұмытылмас естелік болып қалары анық, — дейді сайыс жеңімпазы.
Жеткіншектер хореография, хор, вокал, түрлі аспаптарда ойнау бойынша бақтарын сынады. Біздің өңірдің намысын қорғаған Ирина — Мамлют өнер мектебінің 7 сынып оқушысы. Сайысқа ұстазы Халида Бекшентаеваның жетекшілігімен барған.
–Біз вокал аталымында бағымызды сынадық. Композитор, халық әртісі Латиф Хамидидың «Қазақ вальсы» әнін дайындап апарған болатынбыз. Бұл шығарманы біз мектеп бағдарламасында оқығандықтан сайыста өнер көрсету аса бір қиындық туғызбады. Алматылық өнерсүйер қауымға бұл ән жақсы таныс екен. Оқушым сахнаға шығар алдында қатты қобалжыды. Бірақ көрермендердің қолдауымен барлығы көңілді атмосферада ойдағыдай өтті, — дейді жеңімпаздың оқытушысы Халида Ғалиқызы.
