Петропавл қаласында еріген қар суын сору жұмыстары жүргізілуде, деп хабарлайды Qyzyljarnews.kz тілшісі.
Қалалық әкімдіктің баспасөз қызметінің мәліметінше, бүгінде Петропавл көшелерінде 47 бірлік техника, 24 мотопомпалар және «Тазарту, су бұру және су өткізу құрылыстары» коммуналдық кәсіпорны жеке құрамының 90 адамы жұмыс істейді.
— Жеке құрамның 84 адамы, 43 бірлік техника және 24 сорғыш құрылғы жұмылдырылды. Бір тәулік ішінде қалада шамамен 20 мың текше метр су сорылды. Ең алдымен, сусорғыш техникасы суды су басуға бейім жерлерден тазартады. Қазіргі таңда Рабочий кенті, Береке, Подгора, Солнечный-2 шағын аудандарында жүргізілуде. Жергілікті су тасқынын жою жұмыстары 13 наурызда басталды,-делінген қалалық әкімдіктің баспасөз қызметі жариялаған ақпаратта.
Петропавлда су тасқыны кезеңінде жанар-жағармай және инертті материалдар қоры, үш мектептің базасында құрама эвакуациялық бекеттер дайындалды. Схемалар жасалып, тіркеу журналдары құрылды. Эвакопункттердің ұйымдастырушылық жұмысына жауапты тұлғалар анықталды. Қаланың ветеринарлық стансасы наурыз айының басынан бастап тұрғын үй аулаларын айналып өтті. Су басқан аумақтардан жануарларды эвакуациялау үшін уақытша орындар дайындалды.
