М.Қозыбаев атындағы Солтүстік Қазақстан университетінде алғаш рет білім беру ұйымдарының педагог-психологтары арасында облыстық байқау өтті, деп хабарлайды Qyzyljarnews.kz тілшісі.
Облыстық байқауды жоғары оқу орнының педагогика және психология кафедрасы ұйымдастырды. Сайыс 2 кезеңнен тұрды. Біріншісі сәуірдің 4-і күні өткен болатын. Онда барлық қатысушылар эссе жазған. Ал қорытынды сында педагог-психологтар тәжірибе алмасып, өздерінің кәсіби біліктіліктерін дәлелдейтін зерттеу жұмыстарын ұсынды.
– Байқауға Шал ақын, Айыртау және Қызылжар аудандары мен Петропавл қаласының психолог мамандары келді. Әзірге биылғы сайысқа 9 адам қатысты. Келер жылы олардың қатары артатынына сенім бар, – дейді байқаудың ұйымдастырушысы Әсем Белгібекова.
Байқауға қатысқан педагог-психологтардың үздік жұмыстары өңірдің білім беру жүйесіндегі мекемелерде қолданылатын болады.
