Жолға шығып кеткен жылқы көлік астына түсті, деп хабарлайды Qyzyljarnews.kz тілшісі.
Тайынша ауданында табын иесінің жылқыларға қарамауы салдарынан республикалық маңызы бар «Көкшетау — Омбы» автожолының 100 шақырымында жол-көлік оқиғасы тіркелді. Қорадан қашып кеткен ат Аққұдық ауылынан 10 шақырым жерде жолға шығып, «Mitsubishi» көлігінің астына түсті. Салдарынан теміртұлпарға зақым келген.
– Жылқының иесі 31 жастағы жергілікті тұрғын Әкімшілік құқық бұзушылық туралы Кодекстің 408-бабы бойынша жауапкершілікке тартылды. Сондай-ақ ол автокөлік иесіне келтірілген залалды өтеді. Полиция қызметкерлері еркін жайылымға жол бермеу бойынша тұрақты жұмыс жүргізіп жатыр. Жыл басынан бері ауданда ҚР ӘҚБтК-нің 408-бабы бойынша 262 хаттама жасалды, оның 43-і қыркүйек айында тіркелген, – дейді Тайынша ауданы ПБ бастығының бірінші орынбасары Арғын Аманбаев.
