Биыл өңірде тұрғызылып жатқан 49 көппәтерлі үйдің 25-сі қолданысқа беріледі. Бұл туралы облыстық әкімдікте өткен аппарат кеңесінде белгілі болды, деп хабарлайды Qyzyljarnews.kz тілшісі.
СҚО құрылыс, сәулет және қала құрылысы басқармасының мәліметінше, биыл өңірде баспана тұрғызу мәселесі өзекті болып отыр. Мәселен, бүгіннің өзінде қала әкімдігінде кезекте тұрған азаматтар қатарын азайту мақсатында облыс орталығында 44 үй, тағы 5-уі аудандарда салынып жатыр.
— Жыл соңына дейін өңірде 25 баспана халық игілігіне беріледі. Оның 23-і — облыс орталығында. Нәтижесінде қалалықтардың 1649-ы құтты шаңырақтарына қоныстанады деп күтілуде. Құрылыс жұмыстары «Береке», «Орталық», «Копай» және «Жас өркен» шағынаудандарында жүргізілуде, — дейді СҚО құрылыс, сәулет және қала құрылысы басқармасының жетекшісі Қайролла Ғалеев.
Жыл басынан бері облыста 504 пәтерге шақталған 10 баспана қолданысқа берілді. 2024 жылы 12 үй пайдалануға берілмекші.
