Петропавлда «Мектеп пен отбасының ынтымақтастығы: «Z» ұрпағын тәрбиелеу» тақырыбында педагогтерге арналған республикалық семинар өтті. Шараны «Өрлеу» біліктілікті арттыру ұлттық орталығының мамандары ұйымдастырды, деп хабарлайды Qyzyljarnews.kz тілшісі.
Республикалық семинарға 500-ге жуық мұғалім мен оқытушы қатысты. Білікті мұғалімдер 7 секциядан тұратын іс-шара барысында өз баяндамаларын оқып, «Z» ұрпағын тәрбиелеудегі мәселелерді талқылады. Петропавлда ұйымдастырылған жиын онлайн және офлайн форматта өтті.
– Жаһандану дәуірімен бірге адамзат дамуының төртінші кезеңінде дүниеге келгендерді «Z» ұрпағы деп атайды. Әріп танымай жатып алдымен гаджет тілін меңгеретін балаларды оқытуда мұқият болған абзал. Биылғы шараға 135 педагог офлайн, 300-і онлайн форматта қатысты, — дейді «Өрлеу» БАҰО» АҚ СҚО бойынша «Педагогика және пәндік әдістеме» кафедрасының аға оқытушысы Гүлмайда Мүсетаева.
