Бүгін «Жас өркен» шағынауданында жаңа емхана пайдалануға берілді, деп хабарлайды Qyzyljarnews.kz тілшісі.
Денсаулық сақтау мекемесінің құрылысы 2021 жылдың қазан айында басталған болатын. Биыл көптен күткен нысан қолданысқа берілді. Екі қабатты ғимаратты тұрғызуға және оны толық жарақтандыруға 2 млрд. теңгеден астам қаражат жұмсалды. Бірінші қалалық емхананың филиалы саналатын медициналық орталық «Жас өркен» шағынауданының 34 мың тұрғынына қызмет көрсетпек.
–Соңғы жылдары «Жас өркен» шағынауданында көпқабатты зәулім үйлер, әлеуметтік маңызы бар нысандар бой көтеріп жатыр. Бұған дейін Спорт сарайы, Оқушылар сарайы, теннис орталығы мен қазақ сазды-драма театры қолданысқа берілсе, енді міне жаңа денсаулық сақтау мекемесі тапсырылды. Жергілікті тұрғындар алыс бармай-ақ медицина қызметтерін пайдалана алады, — дейді Петропавл қаласының әкімі Серік Мұхамедиев.
Емхана бір ауысымда 250 адамды қабылдай алады.
— Бірінші қалалық емхананың филиалы деп атанғанымен, негізгі қызмет осы жерде көрсетіледі. Өйткені жаңа емхана қажетті жабдықтармен толық қамтылған. Медициналық қызметкерлерді ауыстырамыз, қосымша 50-60 маман алынады. Тұрғындар мекенжайы бойынша осы емдеу мекемесіне қаралады, нәтижесінде бұрынғы емханаға түсетін күш екі есе азаймақ, — дейді Петропавл қалалық емхананың директоры Николай Новиков.
