Петропавлдың төрт тұрғыны әлеуметтік желілер арқылы жасанды шыршаларды сатқан алаяқтың құрбаны болды, деп хабарлайды Qyzyljarnews.kz тілшісі.
СҚО ПД хабарлауынша, 41 жастағы қала тұрғыны интернет арқылы жасанды шыршаларды сатып алмақ болған. Әлеуметтік желіде өтініш қалдырып, алдын ала 54 мың теңгесін аударған. Өкінішке қарай, артынан тапсырысы келмей, сатушы байланысқа шықпай қойыпты. Алаяққа алданғанын түсінген ол бірден полицияға жүгінді.
– Дәл осындай жағдайға қаланың тағы үш тұрғыны тап болды. Олардың алаяқтардың құйтырқы әрекетіне алданып қалғаны белгілі. Қазіргі уақытта сотқа дейінгі тергеу жүргізілуде, — дейді СҚО ПД баспасөз қызметіндегілер.
Полицейлер қала тұрғындарына тексерілмеген интернет-дүкендерден тауарларды сатып алмауға және алдын-ала төлем жүргізуге болмайтынын ескертеді.
