Петропавлда мемлекеттік қызметшілер арасындағы дәстүрлі спартакиада аяқталды. Үш күнге шақталған жарыс 6 спорт түрінен ұйымдастырылды, деп хабарлайды Qyzyljarnews.kz тілшісі.
Спартакиаданың салтанатты ашылуы Спорт сарайында өтті. Жарыстың шымылдығын ашқан облыс әкімі аппаратының басшысы Олжас Ыдырысов қатысушыларға сәттілік тіледі.
– Спорт – саламатты өмір салтын ұстанудың бірден-бір жолы. Қуантарлығы облыстық деңгейде өткізіліп жатқан сайысқа барлық аудандар қатысып жатыр. Биыл спартакиада екі кезеңнен тұрды. Алғашқысына 500-ге тарта мемлекеттік қызметші бақ сынауға келген, қазір олардың саны бір мыңға жетіп отыр. Жеңіске лайықтылар ғана жететініне сенемін, – деді Олжас Ыдырысов.
Мемлекеттік қызметшілер спартакиадасының бірінші кезеңінде спортшылар үстел теннисі мен волейболдан өз араларында мықтыны анықтаған. Осы жолы қатысушылар тоғызқұмалақ, қазақ күресі, шағын футбол, шахмат, жүзу сынды спорт түрлерінен бақтарын сынады.
