Биыл өңірдегі ауыл шаруашылығы жалпы өнімінің көлемі 56 млрд теңгеден асты. Солтүстікқазақстандық шаруалар 29 мың тонна мал мен құс етін, 136 мың тонна сүт , сондай-ақ 214 млн-ға жуық тауық жұмыртқасын сатқан. Бұл азық-түлік өндірісінің көлемін 7 пайызға арттыруға септесті, деп хабарлайды Qyzyljarnews.kz тілшісі.
Облыстағы ауыл шаруашылығы саласында өндірілген өнім көлемі — 9 пайызға, жарма – 2,4 есеге, ұн – 33,8 пайызға, ет – 24, ірімшік пен сүзбе – 14,3 және макарон өнімі 6,8 пайызға артты. Сонымен қатар, халықты баспанамен қамту — 7,8, құрылыс жұмыстары — 3,6, өнеркәсіп өндірісі 2,3 пайызға өсті.
-Жыл басынан бері өңірге құйылған инвестиция көлемі 65,6 млрд теңгені құрады. Қаржының тең жартысына жуығы ауыл, орман және балық шаруашылығына бағытталған. Соның есебінен биыл өңірдегі ауыл шаруашылығы жалпы өнімінің көлемі мен тамақ өнімдерінің өндірісі артқан,-дейді Ұлттық статистика бюросының СҚО бойынша департаменті басшысының орынбасары Данияр Иманбаев.
Данияр Иманбаевтың айтуынша, биыл бөлшек сауда көлемі 83,9 млрд теңгені құрады. Бөлшек сауданың жалпы көлеміндегі азық-түлік тауарларының үлесі — 44,6%-ды, азық-түлік емес тауарлар 55,4%-ды құрады. Көтерме сауда көлемі — 135,1 млрд теңге. Құрылыс жұмыстарының көлемі 14,2 млрд теңгені құрады.
Фото: ашық дереккөзден
