СҚО полицейлері жол-көлік оқиғаларының алдын алудың жаңа форматына көшті. Тәртіп сақшылары «Нұр-Сұлтан – Петропавл» автожолында қауіпті деген жол учаскелері туралы бейнеподкаст түсірді, деп хабарлайды Qyzyljarnews.kz тілшісі.
Түсірілген жерлердің бірі Аққайың ауданындағы Аралғаш ауылының жанында. Бұл жерде малды соғу қаупі жоғары. СҚО ПД патрульдік полиция батальоны инспекторларының айтуынша, өткен айда оқыс оқиға орын алған. Жүргізуші қараңғыда жылқыны байқамай қалған. Салдарынан жылқы мерт болып, көлік істен шықты. Жүргізушілердің назарын аудару үшін жолдың жиегіне қосымша сиыр макеті орнатылған.
Сондай-ақ, Астраханка ауылының маңында орналасқан патрульдік полиция көлігі макетінің қасында, жылдамдық өлшегіштің маңында да түсірілім жұмыстары өтті. Тақта жүргізушінің жылдамдақты сағатына 1 км-ге асырғанын да қызыл түспен көрсетеді. Бұл жерде жолдан өтейін деп тұрған балалардың макеті орнатылған.
-Бейнежазба YouTube хостингіне салынды. Бұл жүргізушілерді республикалық жолдардағы қауіпті учаскелер туралы хабардар етудің бір тәсілі. Демалыс кезінде жолда әрі-бері жүретін көлік саны артады, жол-көлік оқиғаларының қаупі де өседі. Полиция қызметкерлері апаттың алдын алу бойынша шаралар өткізеді. Мәселен, «Қауіпсіз жол» акциясы шеңберінде тексерістер күшейтіліп, ақпараттық-түсіндіру жұмысы белсенді жүргізіледі. Жолдағы апаттар көп жағдайда жылдамдықты асыру, маневр жасау кезінде бұзушылықтар жасау, сондай-ақ алыс жолға шыққан жүргізушілердің шаршауынан болады, — дейді СҚО ПД ЖПҚБ аға инспекторы Раиль Галиев.
Биылғы 6 айда облыста 127 жол-көлік оқиғасы тіркелді. Салдарынан, 19 адам қаза тауып, 191-і жарақаттанды. Апаттардың 24-і, орташа есеппен әрбір бесіншісі республикалық маңызы бар автожолда орын алған, онда 8 адам қаза тауып, 49-ы жараланды.
