Өңір тұрғындарының арасында сұранысқа ие — Қаражыра көмірінің бағасы бірден 1,5 мың теңгеге арзандады, деп хабарлайды Qyzyljarnews.kz тілшісі.
Петропавл қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің мәліметінше, шілдеде Қаражыра көмірінің тоннасы 17 мың теңгеден сатылса, енді отынның бағасы 1,5 мың теңгеге арзандады.
Бүгінде көмірді Петропавлдағы Береке ықшам ауданы, Ленинград көшесі, 116 мекенжайындағы теміржол тұйығынан 15 500 теңгеден сатып алуға болады. Мұнда қатты отынның 700 тоннасы бар.
Ал Шұбаркөл көмірінің тоннасы — 14 800 теңге. Жұмысшы кенті, Панфилов көшесі, 276 мекенжайында орналасқан теміржол тұйығында бұл көмірдің 700 тоннасы жатыр. Мамандардың сөзіне қарағанда, күзде қара отынның бағасы қымбаттамақ. Жалпы СҚО-ға жылыту маусымына отыннан бөлек 410 мың тонна көмір қажет. Облыс бойынша көмір жеткізілетін 32 теміржол тұйығы бар. Тамыз- қыркүйек айларында тұрғындар үшін өңірге ай сайын 15 мың тоннадан жеткізіліп отырмақ.
