Солтүстік Қазақстан облысының Айыртау ауданында «ГАЗель» автокөлігін басқарып келе жатқан 48 жастағы жүргізушіге полицейлер мен жергілікті жауапкершілігі шектеулі серіктестік қызметкерлерінің көмегі қажет болды, деп хабарлайды Qyzyljarnews.kz тілшісі.
СҚО ПД патрульдік полиция батальонының қызметкерлері Нұрлан Қожахметов пен Елжас Мақұлов бекітілген учаскені патрульдеу кезінде Көкшетау-Рузаевка автожолының 142-ші шақырымында жол жиегіне шығып кеткен автокөлікті байқап қалып, жақын маңдағы «Саумалкөл-Агро» ЖШС-не жүгінген. Серіктестік иесі болған жайтқа бейжай қарамай «К-700» тракторын көмекке жіберген.
– Көлікті өзі шығара алмағандықтан, жүргізуші бізден көмек сұрады. Біреуіміз рөлге отырдық, екіншісі қызметкер тракторға троссты бекітті. Автокөлік жолға шығарылғаннан кейін жүргізуші сапарын жалғастырды, — дейді полиция аға лейтенанты Елжас Мақұлов.
Фото: СҚО ПД баспасөз қызметі
