СҚО полицейлері соңғы 12 айда есірткінің ең ірі партияларының бірін алу бойынша материалдарды сотқа жіберді, деп хабарлайды Qyzyljarnews.kz тілшісі.
Есірткіні саудалады деген күдікпен ұсталған Ақмола облысының 49 жастағы тұрғыны «нашақор» санаты бойынша есепте тұрғаны белгілі болған. Бұрын сотталған азаматтан марихуанна табылды. Қазіргі уақытта осы факт бойынша тергеу аяқталып, материалдар Қазақстан Республикасы Қылмыстық кодексінің 297-бабының 3-бөлігі бойынша «есірткі құралдарын, психотроптық заттарды, олардың аналогтарын өткізу, жөнелту немесе өткізу мақсатында заңсыз дайындау, қайта өңдеу, сатып алу, сақтау, тасымалдау» бойынша сотқа жіберілді.
— Баптың санкциясына сәйкес, кінәліге 15 жылға дейінгі мерзімге бас бостандығынан айыру жазасы көзделген. Жалпы өткен жылы облыста барлығы 241 факті тіркелді. Оның ішінде 17-сі есірткіні аса ірі мөлшерде сақтау фактісі болса, 90-ы өткізу фактісі. Заңсыз айналымнан 423 кг түрлі есірткі, оның ішінде 3,5 кг синтетикалық есірткі тәркіленді, — деді СҚО ПД есірткі қылмысына қарсы іс-қимыл басқармасының бастығы Иван Терзиди.
Фото: СҚО ПД баспасөз қызметі
