Жетісу облысының Үштөбе қаласында қазақ күресінен әлем кубогы өтті. Жарыс көрнекті жазушы, қазақ детективінің негізін қалаушы Кемел Тоқаевтың 100 жылдығына орайластырылды, деп хабарлайды Qyzyljarnews.kz тілшісі.
Байрақты бәсекеде ел намысын 100 килограмм салмақ дәрежесінде «Қызылжар арландары» клубының мүшесі, солтүстікқазақстандық балуан Алтынбек Аусағитов қорғады. Жерлесіміз барлық қарсыластарының алдын орап, алтыннан алқа тағынды.
– Әлем кубогында 4 кездесу өткіздім. Бірінші белдесуде Моңғолия елінің балуаны қарсылас атанды. Кейін тәжікстандық спортшымен күрестім. Жартылай финалда қырғызстандықты ұттым. Финалда Өзбекстан құрамасының өкілін уақытынан бұрын жеңіп, бірінші орынды иелендім. Бұл белдесу төрт минутқа созылды, – дейді Алтынбек Аусағитов.
Алтынбек енді қазан айында Түркістан қаласында өтетін Азия кубогына қатысады.
