Ел Президенті мемлекеттік аппараттың қызметін бюрократиядан арылту туралы Жарлыққа қол қойды, деп хабарлайды Qyzyljarnews.kz тілшісі, Ақордаға сілтеме жасап.
Бюрократиядан арылтудың негізгі қағидаттары форма мәнінің басымдығын, бастапқы қалпы бойынша цифрландыруды, басқарушылық жауапкершілікті, үздіксіз жетілдіруді, регламенттеудің оңтайлылығын айқындайды.
Жарлықта жүйелі және қолданбалы шаралар кешені қарастырылған. Бұл шаралардың жүзеге асырылуы мемлекеттік аппаратта шешімдердің қабылдануын жылдамдатады. Сонымен қатар, мемлекеттік органдардағы бірінші басшылардың дербестігі мен жеке жауапкершілігін арттырып, құжат айналымы мен есеп берушілікті қысқартады.
Атап айтқанда, жүктелген міндеттерді жылдам жүзеге асыру үшін мемлекеттік органдарға нормативтік құқықтық актілерді өздерінің функцияларын заңнамалық деңгейде нақтылап жатпай-ақ қабылдауға құқық беріледі.
Бюрократиядан арылту ісінде мемлекеттік басқарудың барлық саласын цифрлық трансформациялау және жүйелік реинжинирингтеу маңызды болып табылады. Бұдан бөлек, Жарлықта қамтылған шаралар түпкілікті нәтижеге әсер етпейтін, бірақ мемлекеттік қызметшілерді қажетсіз рәсімдер мен үдерістерден босатуға мүмкіндік береді. Әрі мемлекет басшысы Қасым-Жомарт Тоқаевтың саяси және экономикалық реформаларын мемлекеттік аппараттың тиімді жүзеге асыруын қамтамасыз етеді, делінген Ақорданың хабарламасында.
Фото: Sputnik
