Бүгіннен бастап, 2022 жылдың 8 маусымында Мемлекет басшысының «Қазақстан Республикасының әкімшілік-аумақтық құрылысының кейбір мәселелері туралы» Жарлығы күшіне енді, деп хабарлайды Qyzyljarnews.kz тілшісі.
Шығыс Қазақстан облысының құрамынан Ақсуат, Абай, Аягөз, Бесқарағай, Бородулиха, Жарма, Үржар, Көкпекті аудандарын, Семей және Курчатов қалаларын бөлу жолымен әкімшілік орталығы Семей қаласында орналасқан Абай облысы пайда болды.
Алматы облысының құрамынан Ақсу, Алакөл, Ескелді, Қаратал, Кербұлақ, Көксу, Панфилов, Сарқан аудандарын, Талдықорған және Текелі қалаларын бөлу жолымен әкімшілік орталығы Талдықорған қаласында орналасқан Жетісу облысы болып бекітілді.
Қарағанды облысының құрамынан Жаңаарқа, Ұлытау аудандарын, Жезқазған, Қаражал және Сәтбаев қалаларын бөлу жолымен әкімшілік орталығы Жезқазған қаласында орналасқан Ұлытау облысы құрылды.
Сондай-ақ, Алматы облысының әкімшілік орталығы Талдықорған қаласынан Қонаев қаласына көшірілді.
Фото: ашық дереккөздерден
