Биыл өңірде құтырма ауруын алдын алу үшін 171 мыңнан астам малға вакцина салынады, деп хабарлайды Qyzyljarnews.kz тілшісі «Хабар 24» телеарнасына сілтеме жасап.
СҚО ветеринария басқармасы мамандарының айтуынша, вакциналау шарасы ақпан айында басталады. Белгілі болғандай, бүгіндері Ресейдің Омбы облысында бұл ауруының 3 бірдей ошағы анықталды. Осыған байланысты 13 наурызға дейін көрші елде карантин жарияланды. Ал бұл аймақ Солтүстік Қазақстан облысымен шектесіп жатқанын естен шығармаған жөн.
– Өткен жылы өңірде осы індетке қарсы екпе 167 мың мал басына қойылды. Биылғы көрсеткіш одан да көп. Сондай-ақ жабайы аңдар жүретін аумақтарға арнайы брикет түріндегі дәрілер қойылды. Бұл шаруалар алдағы уақытта жалғасатын болады. Жалпы соңғы жылдары біздің облыста құтырма ауруы тіркелген жоқ, – дейді СҚО ветеринария басқармасының бөлім басшысы Қайырлы Қазанов.
