Петропавл әкімдігі 100 еуроконтейнер сатып алып, оларды қоқыс шығаратын ұйымдарға тапсырды, деп хабарлайды Qyzyljarnews.kz тілшісі.
Қалалық әкімдіктің баспасөз қызметінһ қоқыс шығаратын кәсіпорындарды қолдап, қызмет көрсету сапасын арттыру мақсатында жергілікті бюджеттен бөлінген қаржыға контейнерлер сатып алу қажеттілігі туындағанын айтады.
— Қоқыс шығаратын компаниялар дағдарысты бастан кешуде. Тариф бес жыл бойы көтерілмеді. Кәсіпорындар шығынмен жұмыс істейді, соның салдарынан техниканың жиі бұзылуы орын алады. Сондықтан компаниялардың қаржылық жағдайы қалпына келгенге дейін қала әкімдігі қолдау көрсететін болады. Жаңа еуроконтейнерлерді сатып алу – жақсы көмек. Бұл көрсетілетін қызметтердің сапасын жақсартуға көмектеседі, — деп түсіндірді қала әкімдігінің мамандары.
Әкімдік 100 еуроконтейнерді «КоммунСевер», «Мюлсервис» және «Чистый Петропавл» компанияларына пайдалануға берді.
