Футболдан ел кубогының ширек финал ойындары өтті. «Қызылжар» клубы өз алаңында қарымта матчта «Ордабасы» командасымен кездесті, деп хабарлайды Qyzyljarnews.kz тілшісі.
Қызылжарлықтар «Ордабасыға» қарсы ширек финалдың алғашқы кездесуінде 2:0 есебімен жеңілген болатын. Бұл тіркелген нәтижеден соң жерлестерімізге үйде кем дегенде 3:0 есебімен жеңіске жету керек еді. Сондықтан солтүстікқазақстандық аяқдопшылар бірінші минуттардан бастап, азулы қарсыластарынан аянып қалмады. Десе де қонақтар допқа көбірек иелік етті.
Кездесудегі бірінші және жалғыз гол ойынның 73-ші минутында соғылды. Нәтижелі соққының авторы Младен Веселинович атанды. Босниялық жартылай қорғаушы қарсылас команданың айып алаңындағы қарбаласты пайдаланып, допты қақпаға дәл бағыттай алды. Қорытынды есеп 1:0, жеңіс қызылжарлықтар еншісінде. Бірақ бұл нәтиже жартылай финалға өтуге жеткіліксіз болды.
