Жыл басынан бері облыста заңсыз тасымалдаушылардың қатысуымен екі жол-көлік оқиғасы тіркелді, деп хабарлайды Qyzyljarnews.kz тілшісі.
Тәртіп сақшыларының айтуынша, соңғы 5 айда облыста 99 жол-көлік оқиғасы тіркеліп, 10 адам қаза тауып, 148 адам жарақат алған. Апаттың себептері – жол қозғалысы ережелерін өрескел бұзу.
Биыл заңсыз тасымалдаушылардың қатысуымен 2 жол-көлік оқиғасы тіркелді. Солардың бірінде небәрі 2 жыл жүргізу өтілі бар 20 жастағы «Toyota Alphard» жүргізушісі Қызылжар ауданының аумағында апатқа жол берді. Салдарынан 5 адам ауыр жарақат алды, жолаушы әйел қайтыс болды.
– Жергілікті полиция қызметі басқармасы СҚО бойынша көліктік бақылау инспекциясымен бірлесіп заңсыз тасымалдаушыларды анықтау бойынша рейдтер жүргізуде. Жыл басынан бері кәсіпкерлік қызметпен заңсыз айналысқаны үшін 21 әкімшілік хаттама толтырылды. Жолаушыларды тасымалдау ережелерінің сақталуын бақылауды күшейту – полицияның маңызды міндеттерінің бірі, – деді Айдын Байматов.
Талқылау барысында кездесуге қатысушылар заңсыз тасымалдаушыларды анықтаудың бірлескен алгоритмін әзірледі. Қорытындылай келе, Айдын Байматов оң нәтижеге қол жеткізу мүдделі органдар мен жұртшылықтың бірлескен күш-жігерімен ғана мүмкін екенін атап өтті.
