141
Қысы қытымыр теріскейде қар ерте жауатыны жасырын емес. Сондықтан қылышын сүйреп келген мезгілде коммуналдық кәсіпорындар мен құтқару қызметтерінің техникасы кез келген жағдайда тұрғындарға көмекке келуге әзір болуы тиіс. Бұл ретте облыс әкімі Ғауез Нұрмұхамбетов тиісті жұмысқа жұмылдырылатын көліктерді тексерді, деп хабарлайды Qyzyljarnews.kz тілшісі.
Петропавл қаласы әкімдігінің мәліметінше, қазіргі уақытта облыс орталығы көшелерін ақ ұлпадан тазалауға коммуналдық қызметтердің техникасы жұмылдырылып отыр. Белгіленген аумақтарда кәсіпорындар қарды шығарып, құм-тұз қоспасы жолдың қауіпті аймақтарына себілуде.
– Қарды шығаруға жауапты мердігерлермен кездестім. Қыста көшелерді тазалау кезінде үйлесімді және жедел жұмыстың маңызы жоғары. Тұрғындардың қолайлығы мен қауіпсіздігі үшін көшелер мен жаяу жүргіншілер жолына құм-тұз қоспасы және реагенттер себуді ұдайы жүргізуіміз керек, – деп жазды әлеуметтік желідегі жеке парақшасында өңір басшысы Ғауез Торсанұлы.
Жалпы қыста қала көшелерін қардан тазалау жұмыстарына 300-ге жуық техника жұмылдырылатын болады.
