Петропавлда мұғалімдер асық ату мен бес асықтан сынға түсті. «Төрт тоқсан – төрт өнер» ұлттық жобасы шеңберінде облыстық білім басқармасы педагогтер арасында жарыс ұйымдастырды, деп хабарлайды Qyzyljarnews.kz тілшісі.
Биыл алғаш рет мектеп ұжымдары бес асық пен асық атудан жарысып, өз араларында мықтыны анықтады. Абай атындағы мамандандырылған қазақ мектеп-гимназиясында өткен турнирге қаланың орта білім ордаларының мұғалімдері жиналды. Ұлттық спорт түрлерінен ұйымдастырылға сайысқа 18 команда бақ сынауға ниет білдірді.
Жарыста мектептердің әкімшіліктерінен құралған командалар өз араларында үздікті анықтап, асық атудан Абай атындағы мамандандырылған қазақ мектеп-гимназиясы жеңімпаз атанды. Екінші орын Әл-Фараби лицейіне бұйырды. Үшінші сатыға Мамлют ауданына қарасты Ленин орта мектебі жайғасты. Мұғалімдер қатарынан да Абай атындағы орта білім ордасы жеңіске жетті. Екінші орынға Әлихан Бөкейхан атындағы №25 орта мектебі қол жеткізді. Үздік үштікті Әл-Фараби лицейі қорытындылады. Жүлдегерлер мен жеңімпаздарға дипломдар мен кубоктар табысталды.
