СҚО-да жыл басынан бері 250 өрт тіркеліп, 24 адам қаза тапты, 5 адам түрлі жарақат алды. Бұдан бөлек 13 адам газдан уланған. Өрттен келген шығын 106 миллион теңге шамасында, деп хабарлайды Qyzyljarnews.kz тілшісі.
8- мамырда Копай шағын ауданында үш тұрғын үйде өрт шықты.
— Қауіпсіздік техникасы сақталмағандықтан өрт шықты. Сөндіру кезінде төрт газ баллон табылды. Қаза болғандар мен зардап шеккендер жоқ, — деді Петропавл қаласы ТЖ басқармасының бастығы Әзімхан Мерғасымов.
9 — мамыр күні осы шағын ауданда 500 шаршы метр аумақта қамыс өртенді. Жалын тұрғын үйлер мен тұрмыстық нысандарға зиян келтірді.
— Біреу қасақана өрт қойған. Басқарма қызметкерлері полиция қызметімен және әлеуметтік қорғау бөлімімен бірлесіп қала тұрғындарына өрт қауіпсіздігі шаралары туралы және өрт қаупі артқан кезеңде құрғақ шөпті, қалдықтарды жағуға тыйым салу туралы ескертіп, рейдтер жүргізеді, — деді Әзімхан Мерғасымов.
Сондай-ақ, брифингте Заречный кентінде 200-ге жуық саяжайды шарпыған өртке кінәлілер әкімшілік жауапкершілікке тартылғанын хабарлады. Оларға 20 АЕК дейін айыппұл салынуы мүмкін.
