Петропавлда көпірден секірмек болған 4 баласы бар әйелді сол маңда көлігімен өтіп бара жатқан құтқарушы аман алып қалды, деп хабарлайды Qyzyljarnews.kz тілшісі.
Облыстық төтенше жағдайлар департаменті баспасөз қызметінің мәліметінше, құтқарушы Евгений Языков әкесімен бірге туған жері Дубровное ауылына туыстарына барып, үйіне қайтып келе жатқан. Петропавлға кіре берісте Есіл өзенінің үстінде жас әйелдің көпірдің жақтауынан ұстап, төмен қарай секіруге оқталып тұрғанын байқап қалған.
-Сосын бәрі кинодағыдай болды. Мен бірден тежегішті бастым, қуанышқа орай менің артымнан ешкім келе жатқан жоқ еді. Есікті ашып, қарсы келе жатқан көліктің алдынан жүгіріп өтіп, секіргелі тұрған келіншекке ұмтылдым. Ол да қолын босатты, мен де ұстап үлгердім, — дейді Евгений.
Құқтарушы 32 жастағы келіншекті қауіпсіз жерге шығарып, полицейлерді шақырған.
-Келіншек жылап, секіруге не себеп болғанын, өмір сүргісі келмейтінін айтты. 4 баланың анасы екен. Сол жердегі көлік жүргізушілері де келіп қандай көмек керек екенін сұрады. Полиция патрулі келгенше мен әйелді тыңдап, мүмкіндігінше тыныштандыруға тырыстым, — дейді Евгений Языков.
