Солтүстік Қазақстан облысының әкімі Айдарбек Сапаров Петропавл 2-ЖЭО иелері жөндеу жұмыстарын жүргізуге қаржыландыруды ұлғайтуы тиіс деп есептейді. Бұл туралы ол Петропавл әкімінің халықпен кездесуінде айтты, деп хабарлайды Qyzyljarnews.kz тілшісі.
Айдарбек Сапаров жылу орталығының жұмысы қала тұрғындарын алаңдататын басты мәселелердің бірі екенін атап өтті.
— Қала тұрғындарын жылумен жабдықтау мәселесі толғандырады. Бірінші кезекте, Петропавл 2-ЖЭО жұмысы. Мен жылу орталығына барып, жедел кеңес өткіздім. 60-жылдары салынған желілер 70% — дан 80% — ға дейін тозған. Акционерлер 17,5 млрд. теңге бөлді. Биыл 12 млрд. теңге игерілді. Келесі жылы — 5,2 млрд. теңге. Олар құбыр салуға және қазандық агрегаттарын жөндеуге жіберіледі. Менің ойымша, бұл қаражат жеткіліксіз. Акционерлерді шақырып, күрделі жөндеу мен қаржыландыруды екі есе ұлғайту үшін келіссөздер жүргіземіз. Әйтпесе, келесі жылыту маусымы қиын болады. Алдағы уақытта мұндай проблемалар болмауы үшін жоғары деңгейде дайындық жүргізу керек, — деді облыс әкімі.
Фото: ашық дереккөздерден.
